|
29 Julie 2012 - Die nuwe weergawe 12.2 kan nou afgelaai word!
WSpel het pas weergawe 12.2 geloods en met meer as 502 000 woorde in die WSpel-woordelys en duisende inskrywings in MS-Word se AutoCorrect-funksie is WSpel tans die grootste Afrikaanse speltoetser ter wêreld. Daarby voldoen dit aan die spelwyse van die jongste Afrikaanse Woordelys en Spelreëls (AWS) 2009. Dis alles gratis, want WSpel is gratis vir almal onderhewig aan die lisensieooreenkoms.
WSpel is sedert 2002 ’n privaat inisiatief deur Johan Visser, Elfia Visser en Thomas Ellis en spog met baie eerstes in die ontwikkelingsgeskiedenis van speltoetsers wêreldwyd.
WSpel sal die meeste woorde wat in ’n gewone woordeboek voorkom onmiddellik saamvoeg as u dit as twee of drie woorde tik: Voorbeelde is bank rekening, koelte boom, melk tert, yster pot deksel, bind vlies ontsteking en sal sekere woorde weer skei as u dit as een woord tik. WSpel sal veral anglisistiese woorde en frases en swak Afrikaans onmiddellik vervang met die korrekte Afrikaanse woord of frase, byvoorbeeld huidiglik verander na tans. Baie grammatikale hulp word verskaf. WSpel ken die onderskeid tussen baie sinsnedes waarin u bleik/blyk, grote/grootte, reik/ryk, reis/rys, steil/styl, pyl/peil, feil/vyl, wei/wy, verassing /verrassing, verrys, verys en vereis gebruik. Ook die verskil tussen die betreklike vnw. wat en besitlike vnw. wie. Sal die ge- voor werkwoorde soos gebesef, geherhaal, geerken, geontken en geverstaan, outomaties verwyder. Dit sal veral vir andertaliges van groot hulp wees.
WSpel is die eerste en tot dusvêr die enigste speltoetser in die wêreld wat alle skryftekens, wat in Afrikaans gebruik word, outomaties op woorde plaas. (Uitgesonderd natuurlik in gevalle waar daar wel ’n keuse bestaan soos in name en vanne). WSpel ken die onderskeid tussen woorde soos sê, se, hoe, hoë, bere, bêre, ensovoorts, as dit in sinsverband getik word en plaas die skryftekens soos die akuut, gravis, deelteken, kappie en tilde outomaties sonder die gebruik van die alt + syferkodes. As hierdie woorde egter as alleenstaande woorde gebruik word, tik ’n q vas aan die woord om die skryfteken geplaas te kry, bv. seq om sê te kry. Die skryftekens word op alle ander woorde soos nutriënt, meedoënloos, ensovoorts, outomaties geplaas al tik u slegs die enkele woord sonder om dit in ’n sin te gebruik. Gebruik die q ook by alternatiewe spellings vir bv. kartelsaak om kartèlsaak te kry.
WSpel sal soms nie weet watter alternatiewe spelling van name en vanne u in u teks wil voeg nie. Ook nie wanneer u ’n spesifieke woord wil beklemtoon nie. Die letter q word gebruik om hierdie woorde van skryftekens te voorsien: a) andreq sal in André verander. mollerq sal in Möller verander. b) moetq, salq, hierdieq sal in móét, sál, hiérdie, verander. Alle vokale kan beklemtoon word met die gebruik van die q.
Afkortings sal outomaties van punte voorsien word as dit as dws en maw getik word. Dieselfde geld vir titels soos mnr, prof, mev, ds, ens. Die bekende afkortings soos d.w.s., m.a.w., bv., asb., ens. sal voluit verskyn as ’n q vas daaraan getik word en dwsq of mawq sal verander in dit wil sê of met ander woorde. Afkortings met hoofletters, soos atkv, sauk, atr, dvd, dvds, cd, cds, tv, ens. kan met kleinletters getik word. Dit sal outomaties verander word as ATKV, SAUK, ATR, DVD, DVD’s, CD, CD's en TV.
Die q word ook gebruik om te bepaal of sekere woorde met ’n kleinletter of hoofletter getik kan word. Tik die woord altyd met ’n kleinletter soos bv. mistisismeq. Klik regs daarop en die woord sal aangedui word as mistisisme of Mistisisme. Gebruik dit ook saam met enige woord as u wil sien of daar alternatiewe spellings is of tik ’n onbekende woord en as dit onderstreep word, klik regs daarop. Die korrekte spelling word meestal aangedui.
Die ’n word verkry deur slegs die n op die toetsbord te tik. Die afkappingsteken word korrek geplaas. In 'n opskrif in hoofletters tik u Nq vir ’N. Woorde soos ast ware, (albei spelwyses) gn, sn, aant, kan ook sonder die afkapping getik word en dit sal outomaties geplaas word. Die afkappingsteken sal ook geplaas word voor die s in enige woorde soos fotos, silos, buros, ens. as u versuim om dit te tik. Vir sneller tik kan u dit gerus uitlaat.
Tik alle herhalings, soos gou gou, nou nou, fluit fluit, kort kort, ens., as twee woorde en die koppelteken sal outomaties bygevoeg word en u kry gou-gou, nou-nou, fluit-fluit en kort-kort.
Tik enige woorde waar ’n koppelteken as ’n reël moet kom, of moet kom, weens die opeenhoping van klinkers, as twee woorde en ’n woord soos suid afrika sal verander in Suid-Afrika. Enige pleknaam in die poskodegids soos florida noord sal verander in Florida-Noord. Ook aandele indeks sal verander in aandele-indeks. Woorde soos blinkblaar-wag-’n-bietjieboom, Haak-en-steek, kruidjie-roer-my-nie en heen-en-weertjie, kan sonder koppeltekens getik word en dit sal outomaties reggestel word. Feitlik alle koppeltekenwoorde word gedek. Alle woorde soos ge-SMS, geepos en pin nommer sal dadelik gekorrigeer word as ge-SMS en ge-e-pos en PIN-nommer. Die afkorting tv met 130 woorde wat daarop volg, sal verskyn met ’n hoofletter en koppelteken, bv. TV-program, TV-advertensies, TV-skerm, TV-akteur. Tik 5 ℓ-bottel, 2 ℓ-kan, of enige houer of vloeistof met enige aantal liters of mℓ of cm, bv. 2,5 cm-tertbak, a-klank as twee of drie woorde en die koppelteken word outomaties geplaas. Onthou die gebruik van die q. Tik e klankq vir ê-klank, terwyl dit sonder die q e-klank sal gee.
As u woorde soos rooitaal, klaas vakie, mal jan, maljan, kersfees en vele ander so met kleinletters tik, sal dit verander in Rooitaal, Klaas Vakie, Mal Jan, Maljan en Kersfees. Enige woorde wat normaalweg net met ’n hoofletter getik word, kan met WSpel as kleinletters getik word en dit sal gekorrigeer word en selfs koppeltekens sal bygevoeg word. Voorbeelde: groot karoo en groot brittanje sal gewysig word na Groot-Karoo en Groot-Brittanje. Woorde met ’n mengsel van klein- en hoofletters soos kyknet en litnet sal verander in KykNET en LitNET selfs al tik u net kleinletters.
Tik vanne soos, Da Silva, Dos Santos, De Beer, Du Plessis, Le Grange, La Grange, Van der Walt, Van Wyk, Von Willigh met kleinletters slegs as dit van ’n titel, naam of voorletters voorsien is. WSpel sal die voorvoegsel na ’n titel outomaties vervang met ’n hoofletter, maar ook die res soos Beer, Plessis, ens. as u dit ook met kleinletters getik het. As die van slegs op sy eie gebruik word sonder titel , naam of voorletters, moet slegs die voorvoegsel ten minste met ’n hoofletter getik word.
WSpel dui foute aan volgens die woorde in sy woordebasis. As u woorde soos onmidelik, huistoe, moreogend, koefisient, ens. foutief tik, sal dit outomaties verander na onmiddellik, huis toe, môreoggend, koëffisiënt, ens. U kan altyd verseker wees as ’n enkele woord verkeerd getik is en onderstreep word, dat die woord/e wat in die aanbeveling verskyn, wel die korrekte spelling sal aantoon. As u egter verbindings van woorde in WSpel tik soos byvoorbeeld keteltromorkes wat nie in die woordebasis opgeneem is nie, sal dit onderstreep word. As u regs daarop klik, sal die aanbeveling dit aandui as twee woorde: keteltrom orkes. U word dan die keuse gebied om dit in die pasmaakwoordeboek (Custom.Dic) te voeg deur op Add to dictionary te klik. Daar bestaan natuurlik nie ’n orkes wat net uit keteltromme bestaan nie en hiérdie word slegs as voorbeeld gebruik. Daar is egter baie samevoegings wat ons nog nie in ons woordebasis het nie, omdat Afrikaans ’n baie groot taal is en hierdie woorde verskyn nooit in woordeboeke nie. Voeg hulle gerus as een woord by as u op hulle afkom.
Nog ’n nuwigheid is terugvoering d.m.v. klank. Die installering daarvan word in die hulplêer onder die opskrif Klank behandel. Gebruik dit gerus want dit verbeter WSpel nog meer.
Tik byvoorbeeld: Mnr de bruyn het vroeg vanmore gese dat hy nog van dag by die huis sal wees maar dat hy van dag tot dag n mede aanbieder van n tv program op kyknet sal wees. In die aande neem hy skilder kuns klasse by mnr van der linde. Vanmore is ek tuis, maar van more af gaan ek uit huisig wees. Ek gaan kaapstad toe. Die pasient is miv positief. Die landbou uitvoer van suid afrika na die res van die afrika lande het gesteig. Loop na die brug en vandaar af na die berg. Ander kant die berg het dit nie gereen nie, maar aan die anderkant van die rivier was dit die ene moerasse. Gn mense sal die fotos van haar wil koop nie.
en WSpel sal dit outomaties korrigeer: Mnr. De Bruyn het vanmôre vroeg gesê dat hy nog vandag by die huis sal wees maar dat hy van dag tot dag 'n mede-aanbieder van 'n TV-program op KykNET sal wees. Saans neem hy skilderkunsklasse by mnr. Van der Linde. Vanmôre is ek tuis, maar van môre af gaan ek uithuisig wees. Ek gaan Kaapstad toe. Die pasiënt is MIV-positief. Die landbou-uitvoer van Suid-Afrika na die res van die Afrika-lande het gestyg. Loop na die brug en van daar na die berg. Anderkant die berg het dit nie gereën nie, maar aan die ander kant van die rivier was dit die ene moeras. G’n mens sal die foto’s van haar wil koop nie.
Daar is oneindig baie meer hulp in WSpel, maar die bostaande sal u dadelik help om WSpel met sukses te gebruik. Lees gerus die Hulplêer van Inleiding af en vergewis u van die ander belangrike eienskappe en hulp van WSpel.
Ons doelwit is om die omvattendste en gebruikersvriendelikste speltoetser gratis in Afrikaans daar te stel. WSpel word gereeld bygewerk met nuwe woorde of bestaande woorde wat voorheen nie opgeneem is nie. U kan die program gratis van tyd tot tyd aflaai of laat bywerk - www.wspel.co.za
Die WSpel-speltoetser kom met 'n volledige hulplêer en instruksies wat ook gratis saam met die speltoetser afgelaai word. Bel vir Thomas Ellis by 051 4331956 (Bloemfontein) indien u enige navrae het of hulp verlang.
Geniet dit! U insette en terugvoering is altyd welkom. Gebruik asseblief ons e-posadres wspel@lantic.net... ons hoor graag van u!
Johan, Elfia en Thomas
|
